Drejtori i Përgjithshëm i Policisë së Shtetit Muhamet Rrumbullaku ka reaguar në lidhje me ngjarjen e rëndë të regjistruar këtë të hënë në Baltëz të Fierit ku mbeti i vrarë efektivi i Policisë Novruz Cenalia. Rrumbullaku bën me dije se ai dhe Policia e Shtetit do të bëjnë gjithçka për ta vendosur para ligjit autorin e vrasjes së Novruz Cenalisë, Asllan (Azgan) Mernica. Kryepolici shprehet se uniforma e PSH është e shenjtë dhe kushdo që guxon të cenojë uniformën, shëndetin dhe jetën e punonjësve të saj, do të marrë përgjigjen më të ashpër ligjore.
DEKLARATA PËR SHTYP
Policia e Shtetit dhe unë personalisht ndjehemi thellësisht të tronditur nga vrasja e punonjësit të policisë Novruz Cenalia, mesditën e 13 Majit 2024. Ndarja e parakohshme nga jeta e një djali të ri si Novruz Cenalia na ka hidhëruar të gjithëve, familjen e tij, që është zhytur në lot e zi, dhe familjen e madhe të Policisë së Shtetit. Për të gjithë ne, kjo dhimbje bëhet edhe më e hidhur kur jeta e një punonjësi të Policisë së Shtetit ndërpritet nga dora e një vrasësi, që ende është i lirë. Unë zotohem në emër të Policisë së Shtetit se, do të bëjmë gjithçka për ta vendosur para ligjit autorin e vrasjes së Novruz Cenalisë. Shpreh bindjen se i gjithë opinioni publik ndodhet sot përkrah familjes Cenalia dhe Policisë së Shtetit dhe do të ndihmojë në kapjen e autorit të krimit. E kam theksuar me forcë, edhe pak ditë më parë, gjatë ceremonive përkujtimore për të rënët e policisë, se uniforma e Policisë së Shtetit është e shenjtë. Kushdo që guxon të cenojë uniformën e policisë, shëndetin dhe jetën e punonjësve të saj, do të marrë përgjigjen më të ashpër ligjore. Drejtori i Përgjithshëm i Policisë së Shtetit,Drejtues Madhor Muhamet Rrumbullaku.
