Drejtori i policisë së Fierit, Lorenc Panganika, ka dhënë detaje lidhur me vrasjen e efektivit të ri, Novruz Cenaliaj. Në një deklaratë për shtyp, Panganika ka hedhur poshtë mundësinë e gjakmarrjes si motiv të krimit, duke theksuar se ngjarja duket të ketë qenë rezultat i një konflikti të momentit.
“Rreth orës 13:20 morëm njoftimin për një ngjarje të rëndë ku, pas verifikimeve, u konstatua vdekja e Novruz Cenaliaj, i cili ka qenë pjesë e policisë së Fierit për katër vite dhe i njësisë ‘Shqiponja’ për rreth dy vite,” tha Panganika. Ai shtoi se autori i ngjarjes është identifikuar si Azgan Mërnica, i cili banon në Sulaj.
Panganika bëri gjithashtu thirrje për familjarët e Mërnica që të ndihmojnë në dorëzimin e tij në polici: “Jemi duke punuar intensivisht për të kapur autorin dhe i bëj thirrje familjarëve të tij që të ndihmojnë në vetëdorëzimin e tij. Gjithashtu, makina e autorit është gjetur, që do të ndihmojë në hetimin e mëtejshëm.”
Policia vijon hetimet, duke u përqendruar kryesisht në hipotezën e konfliktit të momentit si shkak për këtë ngjarje tragjike.
