Gjetja e x6-ës pranë shtëpisë së Erion Alibej duket se ka trazuar disi ujërat. Ky i fundit i thirrur në Gjykatën e Posaçme Kundër Krimit të Organizuar në lidhje me vrasjen e Emiljano Ramazanit dhe Regis Runajt ka rrefuzuar të flasë para togave të zeza. Por dëshmia e tij la të hapur mundësinë që Alibej mund të bëhet bashkëpunëtor i drejtësisë.
“Jam i gatshëm të flas, por në një moment të dytë. Më ka ndodhur një problem familjar”, është shprehur Alibej.
Alibej ishte thirrur në cilësinë e dëshmitarit dhe të pandehurit, teksa është pyetur nga gjykata ai për herë të dytë tha se do të fliste, por në një moment tjetër.
Nuk dihet nëse rasti familjar që përmendi Alibej, kishte të bënte me një operacion të fundit në Elbasan ku pranë shtëpisë së tij u gjet një makinë e cila ishte bërë gati për të kryer një krim. Në makinën e vjedhur u gjetën 3 kallashnikovë, maska dhe benzinë për të djegur makinën pas krimit. Ende nuk dihet se kush ishte objektivi që do goditej, por duke qenë se makina u gjet afër shtëpisë së Erion Alibej dhe në bazë të hetimeve, policia ka arrestuar si të dyshuar të afërmit e tij, Arben Spahiu dhe Arsen Preçi.
Gjyqtarja i kujtoi të pandehurit se të njëjtin qëndrim ka mbajtur disa muaj më parë, por Alibej insistoi, se halli familjar sapo i kishte ndodhur.
Kërkesa e tij është pranuar dhe nga prokurori që i tha gjykatës që t’i jepej mundësia të dëshmonte në një moment tjetër.
