Në kuadër të zbardhjes dhe dokumentimin e plotë ligjor të ngjarjes së ndodhur në vitin 2012, në Elbasan, ku mbetën të vrarë me armë zjarri shtetasit Nezir dhe Gentian Beqiri (Babë e bir), policia e Elbasanit ka arrestuar një 28-vjeçar, i cili akuzohet si një prej personave të në këtë vrasje.
Sipas njoftimit zyrtar të policisë, 28-vjeçari Klajdi Dukolli dyshohet se në bashkëpunim me Jorgo Lekun, i cili është arrestuar me parë, 8 vite më parë kanë vrarë me armë zjarri babë e bir në banesën e tyre. Mësohet se Dukolli është edhe një mik i afërt me fisin famëkeq Çapja në Elbasan.
Ndërkohë kujtojmë se shtetasit Nezir dhe Gentian Beqiri, u ekzekutuan 8 vite më parë më 15 gusht 2012, në shtëpinë e tyre.
Njoftimi i plotë:
Vijon puna hetimore për zbardhjen dhe dokumentimin e plotë ligjor të ngjarjes së ndodhur në vitin 2012, në Elbasan, ku mbetën të vrarë me armë zjarri shtetasit G. B. dhe N. B. (babë e bir).
Në drejtimin e Prokurorisë pranë Gjykatës së Shkallës së Parë Elbasan, pas një pune të mirëfilltë hetimore nga Seksioni për Hetimin e Krimeve të Rënda në Drejtorinë Vendore të Policisë Elbasan, në koordinim nga Departamenti i Policisë Kriminale në DPPSH, në kuadër të procedimit penal në lidhje me ngjarjen e ndodhur më datë 15.08.2012, në Elbasan, është bërë kapja dhe ndalimi i shtetasit:
K.D., 28 vjeç, banues në Elbasan, të cilit Gjykata e Shkallës së Parë Elbasan i ka vendosur masën e sigurisë “Arrest në burg”, për veprën penale “Vrasja në rrethana të tjera cilësuese” e kryer në bashkëpunim”, pasi ky shtetas dyshohet se në bashkëpunim me shtetasin J. L. ( i cili është arrestuar me parë), më datë 15.08.2012, kanë vrarë me armë zjarri shtetasit G. B. dhe N. B. (babë e bir), në banesë.
Në drejtimin e Prokurorisë së Rrethit Elbasan vijon puna intensive për identifikimin e personave të tjerë të implikuar në këtë ngjarje.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme procedurale./GazetaReforma.com/
