Policia e Shkodrës ka vënë në pranga shtetasin Marjo Pali, që dyshohet se ka qenë pjesë e vrasjes së dyfishtë që ndodhi mbrëmjen e djeshme në Velipojë. Pali ka marrë pjesë në vrasjen e dyfishtë, së bashku me vëllezërit Eduart dhe Gëzim Frroku, pronar të hotel “Holiday”.
Ishte ora 21:00 e mbrëmjes së djeshme kur një konflikt banal i nisur rreth 2 muaj më parë degjeneroi në përdorimin e armëve të zjarrit. Viktimë nga breshëria e plumbave mbetën Arsid Hoxha, 22 vjeç edhe Ersild Ishmi, 33 vjeç. Ndërsa autorë të dyshuar të kësaj vrasjeje të dyfishtë janë dy vëllezërit Eduard dhe Gëzim Frroku, pronarë të një hoteli. Ata ndodhen aktualisht në arrati.
Drejtori i policisë së Shkodrës Edmond Sulaj tha në një deklaratë për mediat se shkak për ngjarjen dyshohet se u bë një debat i ndodhur në fund të muajit Qershor në hotelin e vëllezërve Frroku, mes kamarierit dhe kuzhinierit.
