Hetimi për vrasjen e Klaudio Prendit ka marrë një rrjedhë të re, pasi hetuesit po shqyrtojnë të gjitha pistat, përfshirë lidhjet e mundshme me klanin Duka dhe lojërat e fatit.
Sipas burimeve, ka dyshime ende të pakonfirmuara se Klaudio mund të ketë administruar një website llotosh, ku së fundmi disa të rinj, të afërm të klanit Duka, kishin fituar gati tetë mijë euro.
Ky informacion është mbledhur nga dëshmitarë të tërthortë, dhe për këtë arsye, policia ka marrë në pyetje disa të rinj të dyshuar për konfliktet që mund të kenë ndodhur rreth kësaj.
Po ashtu, hetuesit kanë bllokuar dy makina si prova, njëra e viktimës dhe tjetra e autorëve, dhe po kërkojnë për më shumë pamje nga kamerat e sigurisë që mund të hedhin dritë mbi momentet e vrasjes.
Një pistoletë e gjetur në makinën e autorëve cilësohet si provë e rëndësishme, ndërsa dëshmitë e dy efektivëve që ishin të fundit që takuan Klaudion po shqyrtohen me kujdes.
Policia ka zbuluar se viktima nuk kishte shfaqur shqetësim kur ishte takuar me ta, duke shtuar më tej misterin e ngjarjes.
Në anën tjetër, një aspekt tjetër që e ka komplikuar hetimin është fakti se Klaudio ishte djali i Fran Prendit, një ish-gjyqtar i krimeve të rënda që ka qenë i përfshirë në dënimin e anëtarëve të grupeve kriminale, si dhe në çështjen e Salvadore Letizias, anëtar i Kamoras.
Kjo lidhje ka shtuar dyshimet për mundësinë e përfshirjes së elementëve kriminalë në vrasjen e tij.
