Policia e Durrësit ka zbardhur vrasjen e Branko Shkozës, duke arrestuar autorin, Majlind Habibi, mbrëmjen e djeshme.
Familjarët e viktimës, të cilët njihen prej kohësh me autorin, janë shprehur të habitur nga ngjarja.
Vëllai i viktimës ka deklaruar se të gjithë familjarët janë të përfshirë në krim, pasi ishin në dijeni të ngjarjes dhe e kishin fshehur. Ai ka theksuar se ka dyshuar vetëm te Habibi dhe ka kërkuar hapjen e kamerave dhe arrestimin e të gjithë familjarëve.
“Vëllai im nuk ka pasur konflikt me askënd dhe nuk e di se si ndodhi. Kam dyshuar vetëm te ky person dhe besoj se janë të gjithë të përfshirë. Ata e kanë ditur krimin dhe nuk na e kanë treguar. Katër ditë nuk e kemi gjetur vëllanë. Autori ka pranuar krimin, ndërsa familja e tij e ka ditur dhe fshehur kufomën. Kërkoj arrestimin e gjithë familjarëve për fshehjen e ngjarjes”, ka thënë vëllai i viktimës.
