Biznesmeni Demir Backa mbeti viktimë e një atentati mafioz mbrëmjen e të shtunës në qytetin e Fierit.
Vijojnë shoqërimet për vrasjen e biznesmenit Demir Backa në Fier. Në bazë të informacioneve të policisë se mes 57-vjeçarit dhe Arben Isufit i njohur me nofkën Ben Qimja, kohë më parë ka pasur një konflikt për motive të dobëta, policia ka kërkuar ta shoqërojë për ta pyetur.
Burime për “BalkanWeb” bënë me dije se policia ka shkuar 3 herë në banesën e tij, por nuk e ka gjetur. Familjarët kanë deklaruar për policinë se ai është me punë në kryeqytet. Policia i ka lënë një fletëthirrje që ai të paraqitet në polici për të treguar se ku ka qenë mbrëmjen e 23 tetorit, ndërsa ende nuk është paraqitur.
Demir Backa u vra mbrëmjen e së shtunës, 23 tetor teksa ndodhej në makinën e tij në parkingun e një qendre tregtare. Plot 18 plumba u zbrazën mbi të, teksa pak minuta pas krimit autorët dogjën një automjet në dalë të Fierit. Policia ka shoqëruar deri tani disa persona, por ende pa gjurmë të sakta të autorëve të krimit.
Makina e djegur e autorëve të krimit ndodhet në mjediset e komisariatit të Fierit, aty ku do të ekzaminohet gjithçka ka mbetur prej saj.
Në vendin u ku dogj mjeti janë studiuar të gjitha rrugët nga ku mund të largoheshin autorët.
