Ditën e sotme Ministrja e Shtetit për Rininë dhe Fëmijët Bora Muzhaqi nuk u është përgjigjur pyetjeve të gazetarëve mbi rastet e abuzimit seksual apo vrasjes së Mateos së vogël, ngjarje që ka tronditur gjithë vendin. Gazetarët këmbëngulën dhe kërkuan vetëm dy minuta kohë prej saj, por Muzhaqi u largua me një buzëqeshje teksa thoshte se ishte shumë vonë e duhej të largohej.
Pjesë nga biseda:
Gazetarja: Donim t’ju bënim disa pyetje mbi abuzimet
Bora Muzhaqi: Jam shumë vonë më duhet të lëviz
Gazetarja: Mund të përgjigjeni se dy minuta ju marrim. Kjo është përgjigjia juaj? Drejtoni një institucion…
Bora Muzhaqi: Institucioni im nëse do të kishit lexuar VKM-në që tregon përgjegjësitë e mia, do e kishit kuptuar përgjigjen time.
Gazetarja: (Nuk kuptohet mirë)
Bora Muzhaqi: Mirupafshim
Nga ana tjetër, familjarët e Mateo Vasiut, 8-vjeçarit që u vra dhe u gropos nga fqinji i tij, Klodian Çalamani janë ngritur në këmbë dhe po firmosin një peticion përmes të cilit kërkojnë varjen e 38-vjeçarit. Ata janë përplasur dhe kanë krijuar tensione në Gjykatën e Fierit ditën e sotme duke bërë që trupa gjykuese të caktojë masën “arrest me burg” pa praninë e 38-vjeçarit në sallë.
Më vonë ministrja Bora Muzhaqi ka kërkuar ndjesë për mënyrën se si iu largua gazetarëve mesditën e sotme, pas interesimit të këtyre të fundit për vrasjen e vogëlushit Mateo Vasiu në Lushnje. Në një postim në rrjetet sociale, duket se Muzhqi ka gjetur kohën e nevojshme për të kërkuar ndjesë pasi para mediave nuk dha asnjë përgjigje apo koment mbi ngjarjen e rëndë, poru largua duke thënë se ishtë bërë vonë.
Muzhaqi shton se ka ndjerë neveri për reagimet politike e mediatike që u bënë pas injorimit total që shfaqi ministrja ndaj mediave. Gjithsesi, ajo shkruan se është prekur për ngjarjen e rëndë, por përgjegjësia e saj mbi fëmijët është për aktivitetet jashtëshkollore e për këtë arsye nuk i është dukur e udhës që të japë një mendim.
“Ndjesë nëse kam lënë shteg për keqkuptimin e kujtdoqoftë që ka pritur një përgjigje tjetër nga unë, përballë disa mediave të cilat m’u gjendën përballë duke shkuar për një tjetër takim pune. Jam thellësisht e prekur si të gjithë nga tragjedia e Fierit dhe besoj se gjithçka mund të bëhet më tutje për adresimin e çështjeve të pyetjes, do të bëhet, ashtu si duhet, nga institucionet. Detyra ime funksionale është angazhimi me programet jashtëshkollore të nxënësve e studentëve, si dhe programet e aktiviteteve për fëmijët në komunitet. Prandaj dhe nuk m’u duk e udhës të jap një opinion personal mbi fusha të tjera specifike për të cilat m’u drejtua pyetja. Ndërsa për sa i takon sarkazmës politike apo mediatike me tragjedinë, nuk kam asnjë koment. E kam neveritur gjithnjë lojën publike me dhimbjen e shkaktuar prej tragjedive. Por sot e provova shijen e saj drejtëpërdrejtë. Vdekja e dhunshme e një fëmije nuk mund të jetë kurrë arsye për të luajtur me njeri-tjetrin. Ndjesë edhe njëherë atyre që kanë keqkuptuar përgjigjen time,”- shkruan Muzhaqi.
