Mëngjesin e ditës së djeshme, një sherr i përgjakshëm ndodhi në një market të Tiranës, ku dy të rinj u konfliktuan për rradhën e pagesës tek kasa. Si pasojë e konfliktit humbi jetën nga plagosja me armë zjarri 29-vjeçari Jurgen Duka, ndërkohë që autori i ngjarjes, Arbër Sula, 27 vjeç banues në Sauk ishte efektiv policie në Dibër.
Fillimisht Duka ka mbetur i plagosur ndërsa ka ndërruar jetë në spitalin e Traumës në Tiranë, pasi plumbi e preku në zemër
Ndërkohë që një ditë pas vrasjes së 29-vjeçarit Jurgen Duka, pas sherrit në një market në Tiranë, policia ka arrestuar një prej personave të përfshirë.
Në pranga ka rënë 36-vjeçari O. D., i cili, sipas bluve të kryeqytetit, ka qenë i pranishëm kur ka ndodhur konflikti, por nuk ka kallëzuar krimin.
“Balkan Web” raporton se është arrestuar shtetasi Orgest Drazhi, i cili ishte mik i viktimës.
“Specialistët e Seksionit për Hetimin e Krimeve në Komisariatin e Policisë Nr. 2 bënë arrestimin në flagrancë të shtetasit O. D., 36 vjeç, pasi në rrugën “Irfan Tomini”, duke qenë prezent në konfliktin e çastit ku humbi jetën shtetasi J. D., nuk ka kallëzuar krimin. Ndërkohë nga shërbimet e Policisë, vijon puna intensive për kapjen dhe vënien para përgjegjësisë të autorit të krimit, shtetasit A. S”, thuhet në njoftimin e policisë.
