E gjithë Vlora u trondit nga vrasja e Kristian Breshanaj në agimin e ditës së Fitër Bajramit, teksa shkaqet e ngjarjes së rëndë vijojnë të jenë të paqarta për Policinë dhe Prokurorinë e Vlorës.
Teksa po bëhen 48 orë nga ngjarja, oficerët e Policisë kanë shumë dyshime mbi mënyrën dhe shkaqet e ndodhjes së këtij krimi të rëndë.
Breshanaj, kishte vetëm tre muaj që qëndronte në Vlorë, pasi ishte deportuar nga Belgjika dhe marrja e informacioneve nga Policia belge, do të ndihmonte Policinë e Vlorës të qartësonte hetimet dhe dyshimet mbi rrethanat dhe shkaqet e kësaj vrasjeje.
I riu nuk ishte i skeduar ndonjëherë nga drejtësia për ndonjë ngjarje, dhe kjo e bën akoma më të vështirë ngritjen e një piste konkrete.
Report Tv raporton se Breshanaj, mund të jetë ekzekutuar nga anëtarët e një grupi në Vlorë, të cilët besohet se kanë dyshuar se ai ishte informator i një grupi kriminal në Vlorë.
Pas kthimit nga Belgjika, Breshanaj shpeshherë qëndronte në disa kafene, që ndodhet shumë afër një kompleksi banimi në zonën e “Ujit të Ftohtë” në Vlorë, ku është zona e influencës së një grupi kriminal në qytetin e Vlorës dhe nisur nga këto rrethana, Policia ka ngritur dyshime të bazuara në informacione operative, se anëtarët e grupit kriminal, mund të kenë dyshuar se prania e shpeshtë në këtë zonë e Breshanaj, çonte prej tij informacione tek krahu tjetër kundërshtar.
Ngatërresa mund të ketë ndodhur për shkak edhe të mankthit të anëtarëve të grupit, se rivalët mund t’i godasin me një atentat të mundshëm.
Ky mund të jetë shkaku që anëtarët e grupit ta survejojnë dhe ekzekutojnë shumë pranë shtëpisë, në një atentat mafioz dhe pa shumë zhurmë, Kristian Breshanaj.
Pas ngjarjes së rëndë, autorët dogjën makinën tip BMW me targa greke, në një nga rrugicat e lagjes “10 Korriku, shumë afër vendit të ngjarjes, teksa brenda mjetit u gjet edhe arma tip kallashnikov, e cila u përdor gjatë atentatit.
Viktima ishte fëmija i vogël i familjes Breshanaj, ndërsa ka një vëlla më të madh që jeton jashtë vendit, kurse i ati punon si mjek reanimator.
