Një ngjarje e rëndë ndodhi në Ferizaj të Kosovës, ku dy persona rrahën për vdekje një 18-vjeçare dhe më pas e braktisën atë para dyerve të spitalit të qytetit.
Kjo ngjarje ka ngjallur mjaft reagime dhe replika nga qytetarët, artistët dhe politika në Kosovë.
Ndërkohë që Policia është në kërkim të Dardan Krivaqës, i dyshuar për vrasjen e 18-vjeçares në Ferizaj, Marigona Osmani, një video po qarkullon në rrjete sociale, ku shihet një person që tenton të arratiset. Sipas mediave kosovare në video duket pikërisht autori i dyshuar për krimin e rëndë Dardan Krivaqa.
Burimet nga Policia e Kosovës në rajonin e Ferizajt kanë thënë për Telegrafin se dyshohet se në këtë video e cila sipas tyre është bërë dje (të hënën), është i dyshuari të cilin Policia e ka kërkuar mbrëmë në të gjithë zonën.
Mësohet se banorët e lagjes ku u vra 18-vjeçarja në Ferizaj, kanë telefonuar rreth orës 20:30 minuta policinë dhe kanë informuar se kanë parë të dyshuarin kryesor për ngjarjen, Dradan Krivaqën të ulur në shkallët e oborrit të lagjes. Reagimi i policisë ka qenë i menjëhershëm, por raportohet se ai kishte mundur të largohej nga vendi i ngjarjes.
Burime bëjnë me dije se policia ka ushtruar kontrolle të imtësishme në të gjithë zonën dhe në banesa, ndërsa banorët janë shprehur se ai ka ndryshuar pamje për të mos u njohur, sipas tyre ai ka prerë flokët. Sipas dëshmive të tyre ai ka qenë i veshur me një bluzë dhe me kapele.
