Një ngjarje e rëndë ndodhi në Ferizaj të Kosovës, ku dy persona rrahën deri në vdekje 18-vjeçaren Marigona Osmani dhe e lanë më pas në dyert e spitalit. Ditën e sotme avokati i familjes së 18-vjeçares, Gazmend Rexhepi ka zbardhur dëshminë e Arbër Sejdiut.
Avokati thotë se sipas deklaratës vajza është rrahur në mënyrë sistematike për dy ditë rresht. Marigona është dhunuar fizikisht dhe psikologjikisht gjatë dy ditëve të fundit përpara se të ndërronte jetë. Arbër Sejdiu thotë se 18-vjeçarja bërtiste dhe përpara se të humbte ndjenjat ka vjellë.
“Deklaratën e kam pa dje, ai ka thënë se vajza është rreh në mënyrë sistematike pothuajse gati çdo ditë…Deklarimi i tij është që dy ditët e fundit Marigona ka përjetuar dhunë fizike. Arbri ka qenë në dhomën tjetër ku ka nejt Marigona, dmth partneri i saj Dardan Krivaqa, dy ditët e fundit standard i ka shkaktu dhunë fizike dhe psikike. Ka pas shumë piskama, qysh e ka citu ai, nga ana e Marigonës dhe dhunë fizike. Thotë kur kemi hy në dhomë ka pas vjellje dhe në atë moment e kemi marrë e kemi çu në spital”, tha Rexhepi.
Ndër të tjera Rexhepi ka shtuar se janë në pritje të raportit të autopsisë, ndërsa ka treguar se certifikata e vdekjes i është dorëzuar familjes së vajzës.
“Autopsia nuk është dorëzuar akoma, certifikatën e vdekjes ia kanë dhënë familjes do të thotë që është konstatuar vdekja e saj. Dje kam qenë në prokurori, e kam dorëzu autorizimin, prokuroria ka thënë se akoma nuk e kanë marrë raportin e autopsisë. Vetëm konstatimi që ka dal në publik nga Ministria e Drejtëisë, që është thënë për politraumë dhe thyerje. Prokuroria është në fazën e hetimeve na kanë thënë dhe na kanë premtu që për çdo shkresë do të njoftohet avokati dhe familja”, përfundoi ai.
