Kryetari i Lëvizjes Vetëvendosje Albin Kurti u ka bërë thirrje të gjithë shqiptarëve që jetojnë në amerikë të votojnë kundërshtarin e Trump, Joe Biden.
Kurti ka shpërndarë në rrjetin social Facebook një video ku shprehet se Biden ka qenë një mbështetës i palëkundur i shqiptarëve. Kurti ka thënë se një votë për Joe është një mundësi e përbashkët për drejtësi dhe liri.
“Për shqiptarët në të gjithë Shtetet e Bashkuara, po ju drejtohem sot, për t’ju nxitur që të votoni për Joe Biden në zgjedhjet e ardhshme presidenciale. Një votë për Joe Biden është një votë për të përforcuar vlerat e përbashkëta të drejtësisë, lirisë, vetëvendosjes dhe mundësive për të gjithë, të cilat gjithmonë kanë lidhur Shtetet e Bashkuara, Kosovën dhe diasporën shqiptare si aleatë të përkushtuar.
Që nga vitet e 90-ta, Joe Biden është një mbështetës i palëkundur i shqiptarëve në Ballkan. Ishte ndër të parët që denoncoi fashizmin serb në epokën e Millosheviqit; që bëri ndërhyrje amerikane në Bosnjë dhe më pas në Kosovë; që kërkoi ndjekjen penale të kriminelëve të luftës dhe që mbështeti pavarësinë dhe njohjen e Republikës së Kosovës.
Shqiptarët kanë një mik të vërtetë dhe alet të dëshmuar te Joe Biden. Një fitore e Biden-it do të kishte një ndikim pozitiv në të dy anët e Atlantikut. Do të sjellte vendet tona edhe më afër njëra-tjetrës në këtë kohë kritike, përderisa bota po lufton pandeminë më të keqe në më shumë se një shekull dhe përballet me kërcënime të reja ndaj të drejtave të njeriut dhe sundimit të ligjit,” është shprehur Kurti.
Zgjedhjet presidenciale në SHBA do të mbahen 3 nëntor. Një garë mes demokratëve të Joe Biden dhe republikanëve të Donald Trump ku gara për president, sa vjen edhe bëhet më e ashpër dhe akuzat mes tyre skan të ndalur.
