Gjatë ditës së sotme 110 minatorë të minierës së Trepçës, hyn në grevë, në shenjë pakënaqësie dhe proteste pas vonesës për marrjen së pagës për muajin janar.
Por nuk kaloi shumë kohë dhe minatorët i dhanë fund grevës dhe iu rikthyen punës. Kryetari i Sindikatës së Pavarur të Punëtorëve të Trepçës, Gani Osmani, tha për mediat kosovare, se minatorët i janë kthyer punës.
Sipas tij, minatorët kanë mbetur pa zgjidhje dhe pa paga.Por, sipas Osmanit atyre u është premtuar që pagën më së largu do ta marrin gjatë javës së ardhshme.
“Deri në orën 16:00 punëtorët kanë qenë në grevë. Ndërrimi i tretë ka filluar punën. Kjo pas premtimeve se pagat do tu dalin deri javën e ardhshme ose edhe më herët, varet se si shitet koncentrati. Kaq mund të themi për momentin”, ka thënë Osmani, për mediat.
Minatorët në vazhdimësi janë duke u ballafaquar me vonesat e pagave të tyre. Në të njëjtën gjendje ishin edhe gjatë muajit janar, ku paga e tyre u vonua deri me datë 22 të muajit paraprak. Kjo nuk është hera e parë që minatorët e Trepçes përballen me probleme të tilla pasi edhe më parë janë futur në protestë për shkak të vonesave në marrjen e pagave.
