Raportuesja për Kosovën në Parlamentin Evropian, Viola von Cramon, ka folur për mediat lidhur me njohjen e targave të Kosovës nga Serbia. Ajo e sheh si një hap të vogël drejt një përparimi në drejtimin e duhur mes dy vendeve.
Në një intervistë për televizionin publik të Kosovës, Von Cramon u shpreh se është e turpshme që deri në 2024 qytetarët e Kosovës kanë pritur për liberalizimin e vizave, edhe pse sipas saj kriteret ishin përmbushur qysh më 2018.
Cramon, që të premten nisi vizitën disaditore në Kosovë, ka takuar udhëheqës institucionesh e liderë opozitarë. Pas disa takimesh ka thënë se “niveli i pjekurisë së demokracisë nuk varet vetëm tek stabiliteti i qeverisjes, por edhe te të drejtat që opozita i gëzon”.
“Në njërën anë është një gjë e mirë, ka një shumicë stabile në parlament, në anën tjetër, megjithatë niveli i pjekurisë së demokracisë nuk varet vetëm tek stabiliteti i qeverisjes por edhe të drejtat që opozita i gëzon dhe pastaj trajtimi se si ndërveprohet me opozitën dhe në këtë pikë do të thosha se gjerat do të mund të përmirësoheshin”, ka thënë ajo.
Ndërsa, për lëvizjen e qytetarëve të Kosovës në shtetin e Serbisë me targa të Republikës së Kosovës, (RKS) Von Cramon u shpreh se e sheh si progres të vogël drejt drejtimit të duhur që nuk mjafton, por që është edhe një hap tjetër drejt njohjes defakto, duke shtuar se duhet të shkojmë deri te njohja e plotë, por që po shihet se ngadalë ka lëvizje drejt normalizimit.
