Gjatë mbledhjes së Komisionit Hetimor për Koncesionet në Shëndetësi, kryetarja e komisionit, Albana Vokshi, ngriti pyetje të shumta rreth kontratës së Check Up-it dhe përfshirjes së ish-ministrit të Shëndetësisë, Ilir Beqaj.
Duke iu referuar një denoncimi nga një punonjës, Vokshi deklaroi se Vilma Nushi, përfaqësuesja e kompanisë që ofron shërbimin e Check Up-it, kishte porositur vartësit e saj të mos përmendnin emrin e Beqajt gjatë komunikimeve.
Vokshi kërkoi që Nushi të sqarojë se cili ishte kodi që përdorej në vend të emrit të Beqajt në komunikimet dhe mbledhjet e kompanisë.
“Dua ta pyes unë Vilma Nushin, kush ishte kodi që përdorte për Beqajn, që i kishte dhënë porosi stafit se ja kam denoncim këtu nga punonjësit e Vilmës,” tha Vokshi, duke theksuar se dëshiron të kuptojë se si dhe përse është krijuar ky kod për të shmangur përmendjen e drejtpërdrejtë të ish-ministrit në kontekstin e këtij koncesioni.
