Tiranë, Shqipëri – Komisioni hetimor i Shëndetësisë u përfshi nga tensione dhe debate të ashpra gjatë një mbledhjeje të sotme, ku kryetarja Albana Vokshi dhe nënkryetari Plarent Ndreca u përplasën ashpër. Konflikti midis tyre u përshkallëzua deri në pikën ku Ndreca u largua nga salla.
Gjatë diskutimit, Vokshi akuzoi Ndrecën për monopolizimin e komisionit dhe përpjekjet e tij për të dominuar debatin. “Ke monopolizuar. Qetësohu. Po fyeni. Do t’ju përjashton nga komisioni. Nuk kërcënoni dot ju. Kush je ti? Ke monopolizuar komisionin do ta drejtosh. Lëre deputetin të flasë,” tha Vokshi, duke kërkuar që Ndreca të lejojë të tjerët të flasin.
Në këtë moment, Ndreca u ngrit për t’u larguar nga salla, duke refuzuar të pranojë fyerjet e adresuara ndaj tij. “Nëse pranon fyerjet…,” u përgjigj Ndreca, ndërsa largohej.
Vokshi e sfidoi atë të rikthehej vetëm kur të qetësohej. “Qetësohu se denoncime të tjera do të kesh o zoti Ndreca. Vetëm me një dhe shih si u bëre. Nuk ke parë asgjë akoma,” paralajmëroi ajo, duke lënë të kuptohet se mund të ketë të tjera akuza dhe denoncime në vijim.
Këto përplasje pasqyrojnë tensionet e larta brenda komisionit hetimor të Shëndetësisë, ndërkohë që debati mbi menaxhimin e sistemit shëndetësor dhe akuzat për korrupsion dhe abuzim me detyrën janë në qendër të vëmendjes publike.
