Një vajzë 3-vjeçare ka rrezikuar jetën pasi ka gëlltitur plot 62 rruaza magnetike, duke shkaktuar një situatë urgjente që kërkoi ndërhyrje të menjëhershme mjekësore.
Ngjarja ndodhi mbrëmjen e djeshme, kur prindërit e fëmijës e dërguan me urgjencë në Spitalin Pediatrik, ku mjekët identifikuan përmes grafisë një grumbull të madh trupash të huaj në stomak.
Mjeku gastrohepatolog Virtut Velmishi, duke folur për rastin, shpjegoi natyrën e ndërlikuar të ndërhyrjes që i shpëtoi jetën të miturës:
“Vajza mbërriti rreth orës 22:00 dhe nga mjeku i turnit më është referuar grafia. U evidencua një konglomerat sferash magnetike. Ajo kishte gëlltitur rreth 62 sfera magnetike, të cilat mund të dëmtonin rëndë traktin digjestiv dhe të rrezikonin jetën e fëmijës”.
Sipas tij, ky është një rast i rrallë për nga numri i madh i objekteve të gëlltitura, dhe ndërhyrja u krye pa pasur nevojë për operacion:
“Mendoni një stomak sa një portokall, ku duhet të heqësh një masë të madhe sferash magnetike. Endoskopia dhe ezofagu i një fëmije nuk e lejojnë lehtë këtë. Ia dolëm t’i ndajmë në katër pjesë dhe, me një kosh endoskopik, arritëm ta kryenim me sukses procedurën. Fëmija u shpëtua nga ndërhyrja kirurgjikale dhe brenda ditës u kthye në shtëpi në gjendje të mirë shëndetësore”.
Edhe pse ndërhyrja rezultoi e suksesshme, mjekët i bëjnë apel prindërve për vigjilencë të shtuar, veçanërisht ndaj fëmijëve të moshës 1 deri në 3 vjeç, ku rreziku për gëlltitjen e objekteve të vogla është i lartë.
“Duhet treguar kujdes i veçantë me bateritë në formë pulle. Ato janë shumë të rrezikshme dhe mund të shkaktojnë djegie të ezofagut brenda vetëm dy orësh”, paralajmërojnë mjekët.
