Një vjedhje e ndodhur në dhjetor të vitit 2023 në fshatin Goskovë të Korçës është zbardhur nga Policia, pas disa muajsh hetime. Ngjarja lidhet me grabitjen e shumës prej 600 mijë lekësh të rinj në një banesë të zonës.
Si rezultat i hetimeve, janë identifikuar tre autorët e dyshuar të vjedhjes, mes tyre një i mitur dhe një person me precedentë penalë. Njëri prej tyre është arrestuar, ndaj tjetrit është ekzekutuar masa e sigurisë “arrest me burg”, ndërsa i mituri do të hetohet në gjendje të lirë.
Njoftimi i policisë së Korçës:
Korçë/Finalizohet operacioni policor i koduar “Goskova”
Zbardhet vjedhja e ndodhur në banesën e shtetasit A. S., ku u vodhën 600.000 lekë të rinj, ngjarje e ndodhur më datë 04.12.2023, në fshatin Goskovë.
Si rezultat i veprimeve hetimore të kryera në bashkëpunim me Prokurorinë, pas një hetimi 2-vjeçar, dokumentohet me prova ligjore autorësia e vjedhjes në banesën e shtetasit Andi Snaço (që ndodhet në burg në Reç).
Vihet në pranga 1 shtetas, ekzekutohet masa e sigurisë për autorin e dytë që aktualisht ndodhet në Institucionin e Ekzekutimit të Vendimeve Penale (IEVP), me masën e sigurisë “Arrest në burg”, për një vepër tjetër penale, si dhe procedohet në gjendje të lirë një 16-vjeçar.
Si rezultat i një pune intensive hetimore, të kryer me metoda speciale, nga specialistët për Hetimin e Krimeve të Komisariatit të Policisë Korçë, në bashkëpunim me Prokurorinë, u bë i mundur dokumentimi me prova ligjore i vjedhjes së kasafortës në banesën e shtetasit A. S., në fshatin Goskovë, Korçë, ku dyshohet se është vjedhur një shumë parash prej 600.000 lekësh të rinj.
Në vijim të hetimeve rezultoi se këta shtetas, në bashkëpunim me njëri-tjetrin, kanë detyruar djalin e shtetasit A. S. që të gjente çelësin e kasafortës që ndodhej në banesën e tij dhe të merrte shumën e parave prej kasafortës.
Në vijim të veprimeve procedurale u bë ekzekutimi i masës së sigurisë për shtetasin A. Ç., 21 vjeç, banues në Goskovë (i arrestuar për një vepër tjetër penale), dhe u arrestua shtetasi Samuel Tepexhik, 24 vjeç, banues në Korçë, për veprat penale “Vjedhja, me pasoja të rënda, e kryer në bashkëpunim” dhe “Shtytja e të miturve në krim”.
Gjithashtu, u caktua masa e sigurisë “Detyrim për t’u paraqitur në Policinë Gjyqësore”, për 16-vjeçarin (nipin e pronarit të banesës), i dyshuar si bashkëpunëtor i autorëve.
Materialet procedurale i kaluan Prokurorisë, për veprime të mëtejshme procedurale.
