Një banderolë e madhe është hapur në sheshin “Nënë Tereza” që kërkon shpalljen e Vjosës Park Kombëtar. Aktivist të shoqërisë civile kanë qenë ata që e kanë ndërmarrë nismën, ndërsa nuk ka munguar prezenca e presidentit Ilir Meta. Ky i fundit ka deklaruar se është detyrë për të si president që të jetë në krah të organizatave për mbrojtjen e mjedisit, ndërsa ka thënë se Vjosa është një pasuri e rrallë për kontinentin dhe duhet mbrojtur.
“Është një detyrim për mua si President i Republikës që të jem në përkrahje të vendosur të shoqërisë civile, të organizatave për mbrojtjen e mjedisit dhe të gjithë trashëgimisë natyrore të vendit tonë, por njëkohësisht të jem në sintoni të plotë me 36 organizata europiane dhe botërore të cilat janë bashkuar me këtë iniciativë për lumin Vjosa dhe kërkojnë shpalljen park kombëtar të lumit Vjosa dhe gjithë degëve. Është një pasuri e rrallë për kontinentin tonë që duhet mbrojtur nga çdo projekt që e cenon atë dhe është dëmtuar jo pak deri tani por jemi në kohë për të parandaluar çdo dëm tjetër që do ishte i parikuperueshëm dhe do dëmtonte një trashëgimi dhe është një mundësi për turizmin, i cili pati mjaft suksese në vitet e fundit, në luginën sidomos të lumit Vjosa”, tha Meta.
Prej kohësh është kundërshtuar ngritja e digave dhe hidrocentraleve ne lumin Vjosa nga banorë të zonës, aktivistë të shoqërisë civile e madje personazhe të njohur mes të cilëve ka qenë edhe aktori Leonardo di Caprio.
