Presidentja e Kosovës, Vjosa Osmani, vazhdon serinë e takimeve me përfaqësues të partive politike në përpjekje për të tejkaluar bllokadën institucionale dhe për të siguruar konstituimin e Kuvendit.
Pas takimit me bashkëkryetarin e partisë Guxo, Faton Peci, ky i fundit u shpreh se këto konsultime kanë si qëllim kryesor gjetjen e një zgjidhjeje për daljen nga ngërçi politik.
Peci bëri apel që të gjitha subjektet politike të veprojnë me përgjegjësi dhe të mundësojnë zgjedhjen e kryetarit të Kuvendit, duke theksuar se vetëm në këtë mënyrë mund të formohet qeveria brenda 15 ditësh.
Ai gjithashtu vuri në dukje paqartësitë lidhur me pasojat në rast se Kuvendi nuk konstituohet brenda afatit 30-ditor, duke theksuar se ekziston mundësia që presidentja Osmani t’i drejtohet Gjykatës Kushtetuese për sqarime të mëtejshme mbi kuptimin e këtij afati.
Përveç takimeve me partitë shqiptare, gjatë ditës Osmani pritet të zhvillojë biseda edhe me përfaqësues të partive nga komunitetet joshumicë.
Dje presidentja pati takime me liderët kryesorë politikë, përfshirë Albin Kurtin nga Lëvizja Vetëvendosje, Memli Krasniqin nga PDK, Lumir Abdixhikun nga LDK dhe Ramush Haradinajn nga AAK.
Kurti u shpreh se do të angazhohet maksimalisht për konstituimin e Kuvendit, duke theksuar se do të vazhdojnë takimet me përfaqësues të tjerë politikë në përpjekje për përparim.
Nga ana tjetër, partitë e tjera të mëdha parlamentare kanë kërkuar sërish votim të hapur për zgjedhjen e kryetarit të Kuvendit, duke mos ndryshuar qëndrim në takimet ndaras me presidenten.
Kosova vazhdon të qëndrojë pa institucione të reja katër muaj pas zgjedhjeve të 9 shkurtit, pasi deputetët nuk kanë arritur të konstituojnë Kuvendin për shkak të mungesës së marrëveshjes politike. Presidentja Osmani ka kërkuar që konstituimi të bëhet sa më shpejt, brenda afatit 30-ditor që ka dhënë Gjykata Kushtetuese.
Këshilltari i presidentes, Bekim Kupina, theksoi më 30 qershor se Osmani pret që partitë në Kuvend të respektojnë këtë vendim dhe të përmbyllin seancën konstituive brenda këtij afati ligjor.
