Presidentja e Kosovës, Vjosa Osmani ka uruar Partinë Socialiste për fitoren në zgjedhjet e 25 prillit. Në një status në Facebook, Osmani uron PS-në, por nuk e përmend asnjë moment emrin e Ramës. Ajo gjithashtu përgëzon Partinë Demokratike dhe të gjitha partitë e tjera për garën zgjedhore. Ndër të tjera Osmani uron që të gjithë përfaqësuesit politikë të kontribuojnë në forcimin e demokracisë dhe bashkëpunimin me Kosovën.
Postimi i plotë i Vjosa Osmanit:
Urime Partisë Socialiste për fitoren në zgjedhjet e 25 prillit. Përgëzoj Partinë Demokratike dhe gjithë partitë e tjera per garën zgjedhore. Uroj që të gjithë përfaqësuesit politik të kontribuojnë në forcimin e demokracisë, sundimit të ligjit dhe bashkëpunimit me Kosovën.
Më herët Partinë Socialiste dhe kryeministrin Edi Rama e ka uruar për fitoren edhe kryeministri i Kosovës, Albin Kurti i cili gjithashtu theksoi rritjen e bashkëpunimit mes Kosovës dhe Shqipërisë. Po ashtu nuk ka munguar as urimi i ish-presidentit të Kosovës, Hashim Thaçi i cili nga paraburgimi i Hagës e quante Ramën “vëllau im”.
Po ashtu Ramën e ka uruar edhe Ali Ahmeti i BDI-së në Maqedoninë e Veriut i cili është shprehur se do i gjendet pranë Shqipërisë. Urime ka pasur edhe nga liderë të tjerë europianë, ndër të cilët kancelari austriak, Kurtz, presidenti francez Macron, kryeministri spanjoll Pedro Sanchez etj.
