Pas grabitjes që ka ndodhur në Bazën Detare të Pashalimanit gjatë paradites së sotme, ka reaguar Shtabi i Përgjithshëm i Forcave të Armatosura të Shqipërisë.
Shtabi i Përgjithshëm i Forcave të Armatosura, përmes një deklarate për mediat njofton se të gjitha strukturat e tij vartëse janë në bashkëpunim të ngushtë me Prokurorinë, Policinë e Shtetit, që nisi zbardhjen e shkaqeve të ngjarjes, brenda Bazës së Pashalimanit.
Gjithashtu mësohet se ka nisur ndjekja penale për 5 ushtarakë.
Deklaratë e Shtabit të Përgjithshëm të FA:
Një ngjarje e shëmtuar është regjistruar ditën e djeshme në Bazën Detare të Pashalimanit, ku është dëmtuar një depo armatimi.
Që prej momentit të parë, Shtabi i Përgjithshëm i Forcave të Armatosura, përmes të gjitha strukturave të tij vartëse dhe në bashkëpunim të ngushtë me Prokurorinë, Policinë e Shtetit nisi zbardhjen e shkaqeve të ngjarjes, brenda Bazës së Pashalimanit.
Policia Ushtarake referoi dokumentat për ndjekje penale në Prokurinë e Rrethit Gjyqësor Vlorë në ngarkim të 5 personave: “Për shkelje të rregullave të shërbimit në objektetet e rëndësishme” si dhe u referuan materiale për veprën penale “Vjedhje”.
Hetimi administrativ i nisur nga SHPFA po vijon dhe po merren të gjitha masat, që çdo person përgjegjës të ndëshkohet për çdo veprim apo mosveprim të tij, sipas ligjeve në fuqi. Shtabi i Përgjithshëm i Forcave të Armatosura dënon aktin por në të njëjtën kohë siguron se, ky rast sporadik, nuk ka dëmtuar sigurinë, gatishmërinë dhe operacionalitetin e Forcës Detare.
Theksojmë edhe një herë se, papërgjeshmëria e ndonjë individi, qofshin ata efektivë të FA, nuk mund të njollosë figurën, modelin e përkushtuar dhe sakrificën e efektivëve të Forcës së Armatosur Shqiptare.
