Ndihmonte me bombola oksigjeni të sëmurët me Covid që trajtoheshin në shtëpi. Drejtoria e Spitalit e trajtoi Mensur Shtyllën si vjedhës dhe ai përfundoi në burg. Në fakt deri tani, sipas prokurorisë, nuk ka prova se ai ka përfituar ekonomikisht nga shpërndarja e bombolave. Madje qytetarët shprehen se ai i ka ndihmuar, pasi kishin nevojë për të mjekuar të afërmit e sëmurë, që i kishin në shtëpi.
Hetimi
Gjatë marrjes në pyetje, Mensur Shtylla ka deklaruar se ai ka rreth 16 muaj që punon në spitalin e Kavajës me detyrë oksigjenist. Ai është shprehur se ka marrë bombola nga Spitali dhe ua ka dhënë banorëve të ndryshëm të Kavajës për shkak të nevojave që kanë pasur në këtë periudhë pandemie, pasi si qytetar i Kavajës ai kishte njohje me ta. I ripyetur nga prokurori ai ka deklaruar se “unë kam vepruar vetë, kam pasur kopje çelësi dhe nuk kam bashkëpunuar me ndonjë person tjetër. Nuk kam njoftuar eprorët e mi për këto veprime që kam kryer”.
Në dosje thuhet se nuk ka asnjë detaj që të vërtetojë se i akuzuari përfitonte ekonomikisht. Ndërkohë që ai është lënë në “arrest me burg”.
Dëshmia e qytetarit
Në dosjen jepet edhe dëshmia e një qytetari me emrin Eduart Cara i cili tregon se si i kishte marrë 7 bombola oksigjeni nga Mensur Shtylla.
“Unë kam njohje me këtë person dhe kam pasur rreth 2 muaj më parë babën tim me Covid-19 dhe akoma është i sëmurë në shtëpi dhe në përkujdesje mjekësore e familjare. Dhe duke qenë se Mensuri punonte oksigjenist ke Spitali Kavajës, unë i jam lutur shoqërisht që të më sillte fillimisht një bombol oksigjeni dhe kam shkuar dhe e kam marre atë me mjetin tim.
Dhe duke qenë se baba im ishte dhe vazhdon i sëmurë unë i kam marrë Mensurit dhe 7 copë bombola oksigjeni ke spitali dhe konkretisht në pjesën e pasme të spitalit ke depoja e oksigjenit, të cilat i ka nxjerrë”, ka deklaruar Cara.
Denoncimi
Denoncimin në polici e ka bërë drejtoresha e spitalit të Kavajës, Loredana Kapidani, e cila deklaron se nga kontrolli ka figuruar se nga 30 bombola oksigjeni që duhet të ishin në spital, janë gjetur vetëm 6, pra mungonin 24.
“Bëmë një mbledhje. Në bisedë Mensur Shtylla na komunikoi se ai do t’i sillte këto 24 copë bombola, por pa dhënë detaje se ku ishin ato. Më pas i dhamë afat 5 ditë për t’i sjellë dhe e pezulluam nga puna deri në zgjidhjen e problemit. Më pas u gjetën 21, domethënë Mensuri kishte risjell në depo 15 bombola”, ka deklaruar drejtoresha. Më pas drejtoresha ka thënë se është konstatuar se Shtylla nuk kishte dorëzuar as faturat e pagesës së oksigjenit. Pas këtij konstatimi është vendosur shkarkimi i tij.
Në mënyrë administrative, në raport me spitalin, Mensur Shtylla është vjedhës, por në lidhje me qytetarët, ai i ka ndihmuar në ditë të vështira. Nëse Shëndetësia do t’ua siguronte vetë këto bombola oksigjeni qytetarëve, nuk do të kishte nevojë që këtë ta kryente fshehurazi ky punonjës i spitalit
/Gazetareforma.com/
