Raportuesja për Kosovën në Parlamentin Evropian, Viola von Cramon ka reaguar në lidhje me deklaratat e presidentit të Serbisë, Aleksandar Vuçiç, lidhur me anëtarësimin e Kosovës në Këshillin e Evropës.
Ai deklaroi se dalja e Serbisë nga Këshilli i Evropës (KiE) është një nga mundësitë në rast se Kosova pranohet në atë organizatë ndërkombëtare.
Viola von Cramon, përmes një postimi në “X”, shkruan se sigurisht që Serbia nuk do të largohet nga kjo organizatë dhe se anëtarët e këtij këshilli do vendosin vetë kë duhet të pranojë dhe kë jo.
“Sigurisht që Serbia nuk do të largohet. Biseda nuk duhet t’i bëjë përshtypje askujt. Anëtarët e Këshillit të Evropës do të vendosin vetë se kë do të pranojnë. Nuk e di se çfarë flet kundër anëtarësimit të Kosovës”, shkruan raportuesja.
Ndryshe, Këshilli i Evropës ka konfirmuar se më 27 mars, në mbledhjen e Komisionit për Politikë dhe Demokraci të Asamblesë Parlamentare, në rend dite do të jetë raporti për Kosovën.
Kosova ka aplikuar për anëtarësim në Këshillin e Evropës më 12 maj 2022.
Ndërkaq, më 24 prill u shënua hapi i parë i suksesshëm për Kosovën me vendimin e Komiteti Ministror i Këshillit të Evropës që t’ia përcjellë Asamblesë Parlamentare të Këshillit të Evropës kërkesën për anëtarësimin e Kosovës.
