Para 2 javësh, në Elbasan u shënua një atentat i mirëfilltë, i cili kishte 2 viktima Lulzim Bitrin dhe Ardian Çollakun.
Më vone u zbulua se 2 viktimat ishin pjesë e grupeve kriminale, me lidhje të ngushtë me Talo Çelën, i shpallur në kërkim kombëtar dhe ndërkombëtar.
Ditën e sotme, në emisionin “Shqipëria Live” bashkëshortja e Lulzim Bitrit tregon që ata së fundmi kishin pasur vështirësi ekonomike, madje kishin marrë edhe kredi për të siguruar nevojat bazike të jetës.
“Ishte shumë e vështirë, dhimbje shumë e madhe. Ishte shumë befasi, shokuese, nuk e prisnim, ai kurrë nuk ka pasur konflikte”, tha bashkëshortja.
Sa i përket vrasjes në Tetovë, për të cilën u dënua me 4 muaj burg, bashkëshortja tha: “Luli ka qenë kalimtar aty, ai që është vrarë ka qenë shoku i Lulit. Kush është ai shtet që të kryesh vrasje e të dënojë me 4 muaj burg. Kohët e fundit ishte pa punë, kishim shumë vështirësi. Morëm edhe kredi për të jetuar.” Ndërsa për ekzekutimin e Everest Çakaj tregon se aso kohe nuk ka qenë fare në Shqipëri.
E pyetur nëse Bitri, i cili u ekzekutua me plumb në zemër, ishte qendra e atentatit, ajo thotë: “Nuk dua të dal në konkluzione po nuk dua të besoj se ka qenë atentat se mund t’ia bënin në mes të lagjes. Ai ikte dhe vinte natën, ka më shumë se 1 vit pa makinë. Kushëriri i Lulit e ka marrë tek shtëpia, më tha se kishin shkuar për të pirë kafe, ishte takuar rastësisht me Ardianin dhe i qëlluan me plumba. Luli ka marrë vetëm një plumb në zemër. Përmendin fise e njerëz të tjerë që nuk i njohim dhe nuk e di a mbajnë përgjegjësi.”
Ndërsa për miqësinë me të shumëkërkuarin për disa vrasje të bujshme, Talo Çelën, thotë: “Unë nuk e njoh por mund të kenë pasur miqësi si çuna lagjesh se janë në një lagje. Ka shumë vite që as ja kemi dëgjuar më emrin.”
