Detaje të reja tronditëse kanë dalë nga dosja hetimore për vrasjen e 14-vjeçarit Erald Xhejo në fshatin Pirg të Maliqit, ku kamerat e sigurisë kanë regjistruar të gjithë dinamikën e ngjarjes.
Sipas hetimeve, disa ditë para krimit, autori i dyshuar Enedio Guri kishte shkuar me një automjet në fshatin Zvirinë, para lokalit të xhaxhait të viktimës, ku kishte xhiruar gomat dhe më pas ishte larguar. Ky veprim konsiderohet si një provokim në vijim të konfliktit të vjetër mes dy të miturve.
Ditën e ngjarjes, Erald Xhejo së bashku me një shok kishin shkuar në fshatin Pirg për t’u qethur në një berberhane pranë lokalit ku më pas ndodhi krimi. Aty ata panë Enedio Gurin që po kalonte me makinë dhe i fishkëllyen, me qëllim për të sqaruar konfliktin mes tyre.
Autori ndaloi automjetin, doli jashtë dhe nisi të debatojë me viktimën. Në kulmin e sherrit ai nxori një thikë, ndërsa Eraldi mori një karrige nga oborri i lokalit për t’u mbrojtur duke e vendosur përpara trupit. Por gjatë përpjekjes për të bërë hapa pas, ai u pengua, moment që Enedio Guri e shfrytëzoi për ta goditur me thikë.
Pamjet e ngjarjes, të filmuara nga kamerat e sigurisë së lokalit, janë një provë kyçe për zbardhjen e plotë të rrethanave të kësaj vrasjeje tragjike që ka tronditur komunitetin.
Policia dhe prokuroria po vijojnë hetimet për të dokumentuar çdo detaj, ndërsa mjeti i krimit, i dyshuar të jetë një thikë, ende nuk është gjetur.
