Kreu i Partisë Demokartike, Lulzim Basha ka reaguar për situatën e zjarreve në vend, ku gjatë pasdites në Gjirokastër u shënua edhe viktima e parë.
Basha i ka shprehur ngushëllimet familjes së Andrea Haxhiajt, që humbi jetën, ndërsa nuk i ka kursyer kritikat për qeverinë. Kryedemokrati thotë se masat gjysmake të qeverisë nuk e kanë normalizuar situatën alarmante të ditëve të fundit. Sipas tij, angazhimi i qeverisë ka qenë përpjekie me mjete rrethanore të papërshtatshme.
Basha thotë se si në rastin e tërmetit, emergjencat civile dhe qeveria ndodhen totalisht të papërgatitura për t’i ardhur në ndihmë qytetarëve dhe për të shmangur katastrofat natyrore. Ai bën thirrje që kushdo që ndodhet në zonat e rrezikuara të largohet, ndërsa kërkon nga emergjencat civile të marrin masa urgjente që brenda mundësive të sigurojnë jetën e banorëve të rrezikuar dhe të shmangin përhapjen e mëtejshme të zjarreve.
Reagimi i plotë:
I shpreh ngushëllimet familjes së Andrea Haxhiaj që humbi jetën sot si pasojë e zjarrit në zonën e Gjirokastrës. Masat gjysmake te qeverisë nuk e kanë normalizuar dot situatën alarmante të shkaktuar nga zjarret e ditëve te fundit në vend. Pavarësisht paralajmërimeve të qytetarëve dhe medias, në shumë zona zjarret vijojnë prej ditësh, ndërsa angazhimi i vetëm i qeverisë ka qenë përpjekje me mjete rrethanore të papërshtatshme dhe servirja e videove te zyrës së propagandës.
Si në rastin e tërmetit, emergjencat civile dhe qeveria ndodhen totalisht të papërgatitura për t’u ardhur në ndihmë qytetarëve dhe për të shmangur pasojat e katastrofave natyrore.
Përgjegjësi i kësaj situate vijon turet e inagurimeve false duke lënë në mëshirë të fatit banorët dhe qindra hektarë që po digjen prej ditësh. Është momenti që çdokush që ndodhet në zonat e rrezikuara nga zjarri të largohet dhe të kujdeset për jetën. Forcat e emergjencës që ndodhen në terren të marrin masa urgjente që brenda mundësive të sigurojnë jetën e banorëve të rrezikuar dhe të shmangin përhapjen e mëtejshme të zjarreve.
