Numri i të vaksinuarve për Covid-19 në Kosovë është thuajse 100 mijë , ndërsa procesi po ecën sipas planit. Ministria e Shëndetësisë njofton se ditën e djeshme kanë marrë dozën e parë të vaksinës, presidentja Vjosa Osmani, dhe kryeparlamentari Glauk Konjufca. Të dy ata kanë bërë thirrje që qytetarët të vaksinohen, në mënyrë që rikthimi në normalitet të ndodh sa më shpejtë.
Njoftimi i MSH:
Presidentja Osmani dhe Kryekuvendari Konjufca vaksinohen dhe ftojnë qytetarët ta bëjnë të njëjtën gjë!
Presidentja e Republikës së Kosovës, Vjosa Osmani dhe Kryetari i Kuvendit të Kosovës, Glauk Konjufca, sot kanë vizituar sallën 1 Tetori për të parë nga afër përgatitjet për fillimin e vaksinimit në masë që do të filloj nga java e ardhshme. Njëkohësisht shprehën mirënjohjen e tyre për Ministrinë e Shëndetësisë dhe personelin shëndetësor për sigurimin e vaksinave dhe procesin e vaksinimit.
Ministri Vitia i njoftoj se deri tani nga afër 100 mijë qytetarë të vaksinuar, nuk ka pasur asnjë efekt serioz anësor dhe se vaksinat janë të sigurta dhe ky proces po ecën sipas planit.
Gjatë kësaj vizite, Presidentja dhe Kryetari i Kuvendit u vaksinuan me dozën e parë të vaksinës kundër COVID-19 në përputhje me planin për vaksinim të Ministrisë së Shëndetësisë.
Presidentja Osmani, me këtë rast ka porositur të gjithë qytetarët që sapo të fillojë vaksinimi masiv, t’i përgjigjen ftesës për vaksinim të Ministrisë së Shëndetësisë. Vaksinat janë të sigurta dhe vetëm përmes vaksinimit dhe respektimit të masave, do të mund t’i kthehemi normalitetit duke mposhtur virusin COVID-19. Sipas saj, vaksina duhet të kuptohet edhe si përgjegjësi, ngase krijojnë siguri dhe mundësojnë këndelljen ekonomike të vendit nga pasojat e pandemisë.
Edhe kreu i Kuvendit të Kosovës, Glauk Konjufca, ka ftuar qytetarët që ta marrin vaksinën, sepse është zgjidhja më e mirë kundër COVID-19. Sipas tij, me vaksinim lehtësohet edhe shteti, ngase bëhet e mundshme hapja, rikthimi i normalitetit, por edhe stabilitet i përgjithshëm.
