Aleanca për Mbrojtjen e Teatrit ka zbritur sot në jug, duke u ndalur në Lushnje.
Aktivistët kanë vijuar turin e mbledhjes së firmave për peticionin për ndërtimin e Teatrit Kombëtar atje ku ishte dhe si ishte, duke kërkuar mbështetjen e qytetarëve.
Ky është qyteti i pestë ku ndalet Aleanca për Mbrojtjen e Teatrit, pas Durrësit, Shkodrës, Burrelit dhe Lezhës.
AMT i ka bërë thirrje qytetarëve të firmosin peticionin, ndërkohë, një nga figurat kryesore të qëndresës për Teatrin, regjisori Edmond Budina theksoi se artistët dhe qytetarët po ngrejnë rezistencën dhe protestën.
“Ne nuk jemi për të bërë parti të re. Jemi për të sjellë qytetarinë në politikën shqiptare. Jemi këtu që të bashkojmë të gjithë qytetarët”, tha Budina.
Kujtojmë se disa ditë më parë kryeministri Edi Rama akuzoi AMT se do kthehet në një parti politike.
https://www.facebook.com/110243613751205/videos/651981418720063/
Aleanca për Mbrojtjen e Teatrit prej shembjes së godinës ka zhvilluar 3 protesta në Tiranë dhe ka nisur një tur në Shqipëri me të cilin synohet që të mblidhen firma nga qytetarë e artistë për rindërtimin e Teatrit Kombëtar aty ku ishte ashtu siç ishte, por rindërtimit është një premtim dhe i Lulzim Bashës.
Mëngjesin e 17 majit me vendim të Këshillit Bashkiak të Tiranës, u shemb godina e Teatrit Kombëtar, vendim ky i pasur me dy protesta të njëpashnjëshme, të cilat është përdorur edhe dhuna policore ndaj qytetarëve.
Opozita ka mbështetur protestat dhe ka thënë se tashmë do të përkrah çdo tubim të qytetarëve, pasi sipas tyre është kaluar vija e kuqe.
Pas shembjes, kryebashkiaku Erion Veliaj kërkoi bashkëpunim me artistët, ndërsa kryeministri Edi Rama premton se godina e re do të jetë moderne dhe do plotësojë të gjithë kërkesat e aktorëve.
Sakaq, nuk kanë munguar edhe reagimet nga ndërkombëtarët, që kanë kritikuar dhe dënuar shembjen e Teatrit.
