Situata nga Covid-19 në vendin tonë duket më serioze seç ka qenë ndonjëherë që nga nisja e epidemisë. Së fundmi, raportohet se një 40-vjeçare ka ndërruar jetë në spitalin e Vlorës, e cila dyshohet se është e infektuar me Covid-19.
Ajo ka shkuar në spital me probleme të rënda më frymëmarrjen dhe ka ndërruar jetë por nuk dihet ende saktësisht nëse ishte e infektuar me koronavirus po jo. Gruas së ndjerë i është bërë tamponi, dhe nesër pritet që të dalë përgjigjia. Nëse ajo rezulton me Covid-19, numri i viktimave brenda 24 orëve shkon në pesë, raporton Dosja.al.
Ndërkohë pak minuta më parë u raportua për një tjetër viktimë që është regjistruar nga Covid-19 në vendin tonë. Sipas News 24 një 42-vjeçar ka ndërruar jetë mëngjesin e sotëm në spitalin Infektiv. Kështu, numri i viktimave nga Covid-19 që nga nisja e epidemisë shkon në 102.
42-vjeçari ishte tranferuar nga spitali “Shefqet Ndroqi” për shkak të komplikacioneve të rënda në frymëmarrje. Tamponi ka rezultuar negativ por simptomat tek i sëmuri ishin shumë dyshuese për Covid- 19. I sëmuri sipas burimeve vuante nga sëmundje të mëhershme të pulmonit.
Deri tani nuk ka ende një njoftim zyrtar nga Ministria e Shëndetësisë, që njoftoi më herët mëngjesin e sotëm se 4 viktima janë shënuar në 24 orët e fundit, mes tyre edhe një 21-vjeçare. Kjo e fundit është viktima më e re në vendin tonë si pasojë e koronavirusit.
Ndërkohë, janë identifikuar 85 raste të reja, teksa vijon të ketë shtrime të reja në spitalin Infektiv, ku situata paraqitet shumë serioze. Aktualisht janë të shtruar 88 pacientë në spital, 12 pacientë janë në terapi intensive dhe 4 prej tyre janë të intubuar në gjendje të rëndë.
