Në Greqi numri i personave të infektuar me Covid-19 po rritet çdo ditë e më shumë duke rikthyer masat kufizuese në disa qytete dhe mbyllja totale për disa zona.
Vetëm ditën e sotme autoritetet shëndetësore greke kanë njoftuar se në 24 orët e fundit janë konfirmuar 2752 raste të reja të koronavirusit në vend, 39 nga të cilat janë zbuluar në kontrollet në portat hyrje të vendit. Numri i përgjithshëm i rasteve është 63321.
Po ashtu, sot janë regjistruar 43 vdekje duke e çuar numrin e përgjithshëm të viktimave në 909 nga fillimi i pandemisë. 297 pacientë janë të intubuar në spitale. Mosha e tyre mesatare është 65 vjeç.
Ndërkohë që 297 pacientë po trajtohen në intubim, 347 pacientë janë shëruar duke u larguar nga spitalet.
Situata është shumë shqetësuese edhe në qytetin e Selanikut, ku sipas mediave greke, 3 në 10 tamponë dalin pozitivë me koronavirus.
Greqia vendosi një javë më parë që të mbyllë qarkullimin plotësisht në qytetet më të prekura, si edhe nga ora 22:00 deri në 06:00 në pjesën tjetër të territorit, ndërsa maskat janë të detyrueshme kudo.
