Suad Lici, administratori i Vllaznisë, është përballur me një atentat pasi ka gjetur një sasi tritoli të vendosur në makinën e tij në rrugën ‘Ahmet Haxhia’, në Shkodër.
Rreth orës 9:00 Lici ka dalë nga shtëpia dhe është drejtuar për tek makina tip ‘Benz’, ku ka pikasur një pako të dyshimtë të mbështjellë me natriban, duke njoftuar policinë e cila ka mbërritur menjëherë në vendngjarje.
Nuk dihet nëse motivet e këtij atentati kanë të bëjnë me klubin që ai drejton, apo aktivitetin e tij jashtë fushës së blertë pasi Lici njihet edhe si biznesmen.
Lici ka qenë futbollist i disa ekipeve, teksa prej 2018 kryebashkiakja Voltana Ademi i besoi pozicionin drejtues në ekipin e Vllaznisë.
Kjo nuk është hera e parë që ai përballet me një ngjarje të tillë, pasi në fillim të vitit që lamë pas ka marrë kërcënime lidhur me ecurinë e ekipit dhe futbollistët që duhet të luajnë në skuadër.
Duket se qyteti i Shkodrës nuk po gjen qetësi pasi javët e fundit është tronditur nga përplasje me armë dhe shpërthime me tritol.
Kujtojmë se më 6 shkurt iu vu tritol banesës së ish-basketbollistit, Nikolin Arrës në në lagjen “Qafë Hardhi” të Shkodërs, duke shkaktuar vetëm dëme materiale pasi familja Arra ndodhet në SHBA.
