Një operacion anti-drogë u zhvillua të shtunën në fshatin Kashniet të Lezhës, ku janë asgjësuar nga policia rreth 4 mijë bimë narkotike. Mësohet se FNSH dhe RENEA kanë zbarkuar në fshatin Kshniet, ku në bashkëpunim edhe me Guardia di Financa po kontrollojnë për gjetjen e parcelave me kanabis.
Ky aksion në zonën e Krujës, është vijuar edhe pasditen e djeshme në Lezhë. Operacioni u zhvillua nga forcat RENEA dhe ato të Ndërhyrjes së Shpejtë, të cilët nga Tirana kanë shkuar për të ushtruar kontrolle në fshatin Kashnjet.
RENEA-t dhe FNSH-të janë ndihmuar edhe nga vëzhgimet ajrore të avionëve të Guardia di Finanza, ndërkohë që janë anashkaluar efektivët vendase, për shkak të frikës së dekonspirimit të operacionit.
Operacioni ka përfunduar me asgjësimin e bimëve me anë të djegies, por nuk ka pasur asnjë person të prangosur. Kjo për shkak se kultivuesit e kanabisit kanë zgjedhur që të mbjellin në një tokë shtetërore, duke vështirësuar kështu identifikimin e “fermerëve”.
Gjatë kontrolleve gjithashtu, u shkatërrua edhe një laborator që shërbente për kultivim të bimëve narkotike, me anë të ngrohjes me llampa, kubikë dhe fidanë kanabis, 5 automjete dhe prova të tjera materiale. Ky është aksioni i dytë i zhvilluar brenda pak ditësh në Lezhë, por nga frika e dekonspirimit, është shmangur bashkëpunimi me policinë lokale.
