Vijojnë hetimet në lidhje me operacionin e finalizuar ku u çmontua një organizatë tradicionale kushtuar trafikimit dhe kultivimit masiv të marihuanës, e cila përfaqëson aksionin më të madh policor kundër këtij specialiteti kriminal këtë vit.
Sipas informacioneve të marra është mësuar se Stefan Curri nga Puka është një nga anëtarët kryesor të klanit mafioz që furnizonte Spanjën me drogë. Curri është mes 107 personave të arrestuar gjatë operacionit të Europol, që përfshiu 3 shtete, Spanjë, Gjermani dhe Shqipëri. Megaoperacioni shkatërroi rrjetin e organizuar kriminal të përbërë kryesisht nga kriminelë shqipfolës, të dyshuar për trafikim ilegal të drogës.
Sipas hetimeve, Stefan Curri me lidhjet e tij rekrutonte njerëz kryesisht nga zona e Pukës dhe Mirditës, paguante biletat e avionit duke i ftuar si turistë dhe më pas i kthente në punëtorë dhe në roje të shtëpive të barit. Ky grup kriminal menaxhonte plantacionet e kanabisit në Spanjë, ku e kultivonin dhe e përpunonin drogen, para se ta shpërndanin në vendet e tjera europiane.
Grupi kriminal ishte shtrirë në shumë vende, ku anëtarët e tij arrestuar kanë histori të trafikut të drogës. Në momentin e ndërhyrjes së Europol, anëtarët e grupit kriminal po devijonin furnizimin me energji elektrike për të kultivuar bimët në ambiente të mbyllura, dhe vlera e energjisë elektrike së vjedhur dhe përdorur për rritjen e bimëve narkotike arrin në mbi 1.6 milion euro.
Europol siguroi ekspertizë dhe mbështetje të gjerë duke lehtësuar shkëmbimin e informacionit përmes kanaleve të tij të sigurta. Në ditën e aksionit, një post komandues u krijua nga Europol për të siguruar koordinim mes vendeve të përfshira. Tre hetues shqiptarë u vendosën në Spanjë në kuadër të projektit që synonte të luftonte krimin e organizuar serioz në Ballkanin Perëndimor.
Nga aksioni 107 persona u arrestuan, përfshirë shtetas shqiptarë, spanjollë, sllovakë dhe grekë, u zbuluan 51 ferma kanabisi dhe u sekuestruan 25 000 bimë kanabis. U konfiskuan gjithashtu 70 mijë euro dhe automjete luksoze.
