Shkon në katër numri i të arrestuarve falë operacionit “Sezoni” për goditjen e veprimtarisë kriminale në fushën e vjedhjes.
Në një njoftim për mediat policia njofton se është arrestuar anëtari i katërt i grupit prej pesë personash që vidhnin kasaforta ndërkohë që pronarët e banesave ishin jashtë vendit.
I arrestuari i katërt është Arjan Rrapi 45 vjeç banues në Durrës dhe organizator i vjedhjeve që bënte grupi. Në momentin e arrestimit policia i sekuestroi Rrapit euro, lekë dhe sendet e vjedhura në banesa.
Më parë 45-vjeçari Rrapi ishte dënuar për veprat penale “Prodhimi dhe shitja e narkotikeve” dhe “Armëmbajtja pa leje”.
Ky person është i dënuar më parë për “prodhim dhe trafik lëndësh narkotike”. Ndërkohë ditën e djeshme policia arrestoi Etem Murataj, Smajl Shkemza dhe Dorjan Basha, si dhe u sekuestruan 10 mijë euro.
Grupi prej pesë personash i kryente vjedhjet në mes të ditës, pa u fshehur, pa maska dhe në kohën kur pronarët e shtëpive ishin larguar për pushime.
Policia ka shpallur në kërkim dhe një 33 vjeçare, si pjesë e grupit, roli i së cilës ishte shitja e bizhuterive e vjedhura jashtë Shqipërisë.
Njoftimi I policisë
Tiranë
Vijon operacioni “Sezoni”, shkon në 4 numri i të arrestuarve.
Kapet dhe vihet në pranga autori kryesor i vjedhjeve, i shpallur në kërkim gjatë operacionit “Sezoni”.
Kapja e 45-vjeçarit, nga Komisariati i Policisë Nr. 2, në bashkëpunim me Komisariatin e Policisë Rrugore.
Sekuestrohen në cilësinë e provës materiale euro, lekë dhe sendet e vjedhura në banesa.
Në vijim të operacionit policor të koduar “Sezoni”, për goditjen e veprimtarisë kriminale në fushën e vjedhjes, finalizuar një ditë më parë nga Komisariati i Policisë Nr. 2, Tiranë, si rezultat i të cilit u vunë në pranga 3 shtetas dhe u shpallën në kërkim 2 shtetas të tjerë, ka vijuar puna me hetime të thelluara, për kapjen e personave të implikuar në këtë veprimtari kriminale.
Në vijim të operacionit, nga shërbimet e Policisë të Komisariatit Nr. 2, në bashkëpunim me Policinë Rrugore, u bë kapja dhe ndalimi i shtetasit A. R., 45 vjeç, banues në Durrës, autori kryesor i vjedhjeve, i dënuar më parë për veprat penale “Prodhimi dhe shitja e narkotikeve” dhe “Armëmbajtja pa leje”.
Ky shtetas, në bashkëpunim me shtetasit e tjerë të arrestuar, vidhte kasaforta, sende me vlerë dhe shuma parash në banesa të ndryshme në Tiranë.
Gjatë kontrollit fizik dhe në banesën e këtij shtetasi u gjetën dhe u sekuestruan në cilësinë e provës materiale sendet me vlerë të vjedhura në banesa, shuma të konsiderueshme parash (euro dhe lekë), veshje, 3 aparate celular, njëra prej kasafortave të vjedhura, 1 automjet dhe sendet që autorët përdornin për të kryer vjedhjet.
Po në vijim të operacionit u bë i mundur dokumentimi i vjedhjes në banesën e shtetasit E. Ç., ku autorët kanë marrë bizhuteri dhe një shumë parash.
Vijon puna për kapjen e shtetases që është shpallur në kërkim dhe për dokumentimin e vjedhjeve të tjera të ndodhura në qarkun e Tiranës, në të cilat mund të jenë të implikuar këta shtetas.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
https://www.facebook.com/1502420603377639/posts/2855546974731655/?vh=e&extid=johrctHNoKKkDnPm
