Duke parë që ndërgjegjësimi i qytetarëve për masat ndaj koronavirusit ishte i ulët, Ministria e Mbrojtjes ka nxjerrë në rrugë makinat e ushtrisë.
Këto të fundit do t’i vijnë në ndihmë policisë, për të mbikëqyrur zbatimin e masave të vendosura nga qeveria.
Ato do të jenë prezente gjatë paradites dhe pasdites, ndërsa do të bëjnë thirrje me megafon për ndërgjegjësim.
Sipas urdhërit të Ramës, qytetarët lejohen të lëvizin vetëm në fashat orare 06:00-10:00 dhe 16:00:18:00.
Gjatë këtyre orareve ndalohet gjithashtu grumbullimi në sheshe si dhe lëvizja me persona të tjerë ngjitur.
Të gjithë ata që shkelin orarin, do të gjobiten me 10 mijë lekë të reja.
Ndërsa për makinat, orari i qarkullimit është 06:00-08:00 dhe 16:00-17:00.
Makinat private duhet të kenë autorizimin përkatës, ndërsa nga kufizimi përjashtohen automjetet e shërbimit të emergjencës dhe ato shtetërore.
Atyre që shkelin urdhërin u bllokohet patenta dhe u sekuestrohet makina.
Bilanci i COVID-19 në vendin tonë është 70 të infektuar, nga të cilët dy janë viktima.
Në repartin e Infektivit ndodhen 35 persona, 3 prej të cilëve mbahen në terapi intensive.
Pas Infektivit, ka filluar funksionimin edhe karantina të Kavalishenca në Durrës, ku ndodhen dy persona.
