Në Zagreb, u luajt ndeshja e parë e turit të tretë për Champions League mes Dinamo Zagreb dhe Legia. Për vendasit shënoi i pari Petkovic në minutën e 60-të, ndërsa miqtë barazuan shifrat me supergolin e Ernest Muçit.
Sulmuesi kuqezi u fut në lojë në minutën e 75-të, ndërsa 7 minuta më vonë gjeti rrjetën, duke shënuar një gol spektakolar. Një gol me shumë peshë për Legian, që kërkon të kualifikohet në grupet e Champions League dhe që për Tiranën do të përkthehej në para prej bonuseve në marrëveshjen e bërë kur shiti sulmuesin.
Pas golit të shënuar, Muçi foli edhe për mediat polake, duke thënë: “Ëndrra ime ishte të fitonim, por edhe barazimi është OK. Çdo gjë do të vendoset në stadiumin tonë të mbushur me tifozët tanë. Do të japim 100% për të fituar atë ndeshje. Mendoj se luajtëm mirë, fituam duele.
Duhej të shënonim gol që në pjesën e parë, pësuam gol në fillimin e të dytës por pastaj luajtëm mirë deri në fund dhe tani çdo gjë është në dorën tonë. Të them të vërtetën, unë duhet të stërvitem edhe më shumë. Pres më shumë nga vetja. Gjëja më e rëndësishme është të ndihmoj ekipin që të fitojë ndeshje dhe të arrijmë objektivat tanë”, tha Muçi.
