Alpinistët që u bllokuan disa orë më parë në malin e Murganës kanë dhënë tjetër version për shpëtimin e tyre. Në një deklaratë për gazetën “Panorama” ata janë shprehur se kanë zbritur vetë nga mali dhe se nuk i është ofruar ndihmë pasi e kanë kërkuar. Ata kanë pohuar se ishin Alpinistët e Gjirokastrës, që bënë të mundur transportin e të riut nëpër humnera dhe terrene mjaft të vështira.
Nga një video e publikuar shihet se ata po transportojnë të riun Ergys Koçi, i cili dëmtoi këmbën, me çarçafë në një terren mjaft të vështirë.
Alpinistët kanë deklaruar se transporti i të riut zgjati plot pesë orë, ndërsa Forcat Shqiponja arritën për t’i ndihmuar vetëm kur ishin afër zbritjes, rreth 1 orë e 30 minuta nga fundi.
“Forcat “Shqiponja” dhe zjarrfikëset mbërritën, kur kishim mbaruar më shumë se gjysmën e rrugës dhe ishim afër zbritjes. Grupet e shpëtimit arritën rreth 1 orë e 30 minuta nga fundit, ndërsa transporti i të riut zgjati rreth 5 orë,”-kanë bërë me dije ata.
Më herët prefekti i Gjirokastrës, Odise Kote deklaroi se Focat Shqiponja në bashkëpunim me grupe të tjera të ndihmës bënë të mundur shpëtimin e alpinistëve në kushte mjaft të vështira për shkak të errësirës dhe erës së fortë. Por me sa duket heronjtë kanë qenë alpinistët, ata që e kanë shpëtuar vetë veten.
