Pas vetëvrasjes tragjike të ndodhur në Bllokun e Sigurisë në Drejtorinë Vendore të Policisë në Tiranë, më 13 maj, Komiteti Shqiptar i Helsinkit ka reaguar me një deklaratë zyrtare.
Sipas Komitetit, viktima, Donald Greku, kishte deklaruar se ishte përdorues i lëndëve narkotike dhe kishte kërkuar trajtim mjekësor.
Megjithatë, mjeku specialist toksikolog nuk kishte përcaktuar një medikament të përshtatshëm për të, ndërsa mjeku i institucionit nuk e kishte konsultuar më tej.
Greku kishte kërkuar disa herë trajtim me Metadon, por i ishte ofruar vetëm qetësuesi Xanax. Komiteti Shqiptar i Helsinkit e ka cilësuar këtë si një problematikë, duke theksuar se mungonte mbikëqyrja e vazhdueshme e të ndaluarit.
Nuk rezulton që dhoma e tij të ishte kontrolluar çdo 3-5 minuta, siç parashikohet nga procedurat e sigurisë, dhe gjithashtu butoni i komunikimit me personelin nuk funksiononte.
Në deklaratën e tij, Komiteti kërkon nga Policia e Shtetit që të krijojë grupe pune për vlerësimin e kushteve në dhomat e sigurisë dhe të hartohen protokolle të veçanta për trajtimin e të ndaluarve që janë vartës të lëndëve narkotike. “Jeta e çdo njeriu është e shtrenjtë dhe duhet mbrojtur,” përfundon deklarata.
Donald Greku, 46 vjeç, ishte arrestuar për vjedhjen e të paktën 4 portofolave në urbanët e Tiranës dhe u gjet i pajetë rreth orës 01:20 të datës 13 mars 2025, në qelinë e tij në Bllokun e Sigurisë.
Ai ishte gjetur i vetëvarur me një copë rrobe që kishte grisur nga tutat që kishte veshur, dhe ishte lidhur me rrjetën e dritares.
Pasi njëri prej policëve konstatoi ngjarjen, ai e preu rrobën dhe njoftoi urgjencën, por mjekët, pas mbërritjes në vendngjarje, e konstatuan se Greku kishte ndërruar jetë.
Gjatë momentëve të para të arrestimit, 46-vjeçari u kishte deklaruar efektivëve se ishte përdorues i lëndëve narkotike të forta.
