Në një seancë të tensionuar në Kuvend, kreu i grupit parlamentar të PD-së, Gazment Bardhi, kërkoi nisjen e një hetimi parlamentar për institucionet që japin kredi, duke e përqendruar fjalën e tij te rasti i Pal Trashajt, i cili u helmua dy ditë më parë në dyert e SPAK, për shkak të problemeve me një kredi.
“Duhet të ishim ndalur në rastin e ndodhur në dy ditët e fundit, i shpreh ngushëllime familjes Trashaj. Kuvendi duhet të reagojë. Nuk mund të heshtim kur ka mijëra qytetarë që vuajnë pasojat me kreditë nga institucione të liçensuara nga Banka e Shqipërisë,” deklaroi Bardhi. Ai theksoi se Banka e Shqipërisë mban përgjegjësi për liçensimin e një kompanie që nisi aktivitetin përpara se të liçensohej dhe për përshtatjen e rregullave sipas interesave të kompanive kriminale.
Bardhi shtoi: “Ata qytetarë kanë punuar tërë jetën për të blerë një shtëpi dhe kur i shkohet i merret kjo shtëpi, i ke marrë jetën. Të evidentojmë përgjegjësitë ligjore të Bankës së Shqipërisë, si janë liçensuar, si janë monitoruar, kur ka vepruar për t’i hequr liçencën, sepse ka vepruar pasi Prokuroria ka nisur hetimet, pse nuk ka ndërhyrë për t’i bllokuar në kohë, çfarë masash ka marrë.”
Ai theksoi nevojën për një analizë të përgjegjësisë së Kuvendit për të ndihmuar qytetarët që kanë rënë viktimë e këtyre kompanive kriminale dhe për të hetuar çdo lidhje të mundshme mes tyre dhe institucioneve të pavarura.
Në përgjigje, deputeti socialist Eduart Shalsi deklaroi: “Jo vetëm unë, por edhe shumë kolegë këtu në këtë sallë, nuk e bëjmë gjumin e qetë. Unë po e hetoj rastin, po mbledh të gjitha të dhënat e nevojshme, por nuk mund të përdoret kjo ngjarje për të sulmuar institucionet e pavarura.” Shalsi nënvizoi se rasti po hetohet dhe të gjitha të dhënat do të mblidhen për të arritur në një përfundim të drejtë.
