Pasi Kosova ashpërosi masat anti-Covid, mesa duket kjo nuk është pritur mirë nga ana e qytetarëve të Kukësit të cilët po zhvillojnë një protestë në Morinë.
Qytetarë të shumtë në të dyja anët e kufirit apo dhe ata që për arsye pune duhet të shkojnë në Kosovë kanë protestuar sot duke kërkuar heqjen e vendimin për të kaluar vetëm me 2 ose 3 doza të vaksinës kundër COVID dhe tampon negativ.
“Lëvizjen e lirë e kemi kudo, vetëm në popullsinë tonë shqiptare na dalin këto pengesa. Mundësisht të hiqen komplet. Edhe mbrëmë “Pfizer” tha që mund të shihej mundësia për t’u bërë vetëm një vaksinë në vit. Çdo shqiptar, çdo kuksian ka familje në Kosovë, nipër, djem e vajza i kemi në Kosovë. Unë kërkoj nga qeveria e Kosovës që të hiqen këto barrier, të bëhet një bashkim kombëtar, jot ë vendosen këto. Të na njihet dokumenti dhe çertifikata e qeverisë shqiptare”, shprehet një nga protestuesit.
Kujtojmë se me masat e reja parashihet që çdo person i cili hyn në Republikën e Kosovës duhet të posedojë : Certifikatën e vaksinimit me tri doza (ose me një dozë të vaksinës Janssen dhe dozë përforcuese) kundër COVID-19, ose certifikatën e vaksinimit me dy doza (ose me një dozë të vaksinës Janssen) kundër COVID-19, bashkë me testin RT-PCR negativ për COVID-19.
Tri doza të vaksinës do t’u kërkohen edhe qytetarëve që hyjnë në vend nga shtetet e rajonit, përfshirë këtu edhe nga Shqipëria e Maqedonia.
