Kryeministri Edi Rama njoftoi pak orë më parë rregullat e reja të lëvizjes pë rata që duan të bëjnë pazar, të shkojnë në farmaci, apo të marrin shërbim urgjent.
Shefi i qeverisë tha se gjatë 24 orëve, do të lejohet vetëm një person të dalë nga shtëpia dhe leja do të merret online nëpërmjet një aplikacioni, ose me telefon.
Pak momente më parë Rama ka prezantuar edhe platformën për aplikimin, që do të jetë portal qeveritar e-albania.
Tashmë në portal është shtuar një shërbim i ri “leje për dalje”, ku mund të bëhet aplikimi dhe konfirmimi merret menjëherë me e-mail apo sms.
Ndërsa për ata që nuk disponojnë kompjuter apo smartphone, Rama tha se po punohet me kompanitë telefonike, ndërsa do të vendoset në dispozicion numri i telefonit 55155, por konfirmimi do të vijë pas 24 orësh.
Të moshuarit ndërkohë përjashtohen nga ky shërbim.
Për pensionistët kryeministri tha se do të kujdesen ekipet e vëna në dispozicion.
Që nga ora 13:00 e ditës së nesërme qarkullimi i këmbësorëve dhe makinave do të pezullohet deri në orën 05:00 të ditës së hënë.
