Operacioni Forca e Ligjit është rikthyer ditën e sotme me një njoftim të bujshëm.
Policia ka sekuestruar mbrëmjen e djeshme në Durrës 1,2 milion litra naftë dhe një mgazinë doganore në pronësi të Lulzim Berishës, ish-kreut të bandës së Durrësit.
Pavarësisht se subjektit “L. B. & E. SH”, i është hequr licenca më 13 shkurt, sërsish vijonte aktivitetin për furnizimin me naftë të anijeve në portin e Durrësit, nëpërmjet shantazhit ndaj konkurencës dhe duke tentuar të krijojë monopol kërcënues për operatorët e industrisë së peshkimit.
Njoftimi i plotë
Policia e Shtetit Në kuadër të operacionit “Forca e Ligjit”, përgjatë dy muajve të fundit, OFL nuk e ka ndërprerë punën asnjë ditë. Në bashkëpunim me agjencitë e tjera ligjzbatuese, OFL ka vijuar hetimet dhe goditjen e subjekteve të Ligjit Special.
Së bashku me Strukturat e Specializuara të Hetimit Financiar në Policinë e Shtetit dhe Doganat, në vijim të luftës kundër informalitetit, evazionit, ushtrimit të aktiviteteve të palicencuara dhe abuzimeve me tregun e hidrokarbureve, mbrëmjen e djeshme OFL sekuestroi 1,2 milion litra naftë dhe një magazinë doganore, në Durrës, në pronësi të subjektit privat L. B. & E. SH.
Këtij subjekti, më datë 13.02.2019, me vendimin nr. 85, i ishte revokuar licenca nga autoritetet kompetente shtetërore “Për ushtrimin e veprimtarisë së furnizimit me karburant, për konsum të anijeve në porte”. Pavarësisht revokimit të licencës, subjekti ka vazhduar të ushtrojë në mënyrë të paligjshme aktivitetin e tregtimit të naftës për peshkimin, duke përdorur shantazhin ndaj konkurrencës dhe duke tentuar të krijojë një monopol kërcënues për operatorët e industrisë së peshkimit.
Pasi e ka ndjekur fillin e këtij organizimi kriminal, OFL ka kryer mbrëmë operacionin e sekuestros dhe po vijon, në bashkëpunim me Strukturat e Specializuara të Hetimit Financiar, hetimin intensiv për zbulimin dhe dokumentimin e gjithë veprimtarisë kriminale në këtë fushë dhe lidhjen me persona të tjerë publikë e privatë. OFL do informojë publikun në vijimësi për ecurinë e këtij operacioni të rëndësishëm, i cili tregon edhe njëherë se pasuritë kriminale nuk do të mbijetojnë në duart e subjekteve të Ligjit Special apo familjarëve e rrethit të bashkëpunëtorëve të tyre.
Lulzim Berisha ishte një nga emrat e parë të listës së OFL.
Pasi i shpëroi burgimit të përjetshëm, ish-kreu i bandës së Durrësit iu fut biznesit, duke hapur një bar kafe në Durrës, një kompani pritave sigurimesh “One Security” dhe kompaninë e hidrokarbureve “Rajan”.
Pak muaj më parë OFL i ka bllokuar Berishës një makinë të blinduar tip “BMW”.
Avokati dhe motra e tij ndërkohë janë shprehur se Berisha nuk ka pasuri të paluajtshme dhe siguron jetesën me një autobot që mbush naftë dhe një lokal të vogël.
