Vendimi i dy prokurorëve të Tiranës, Ervin Karanxha dhe Gjergji Tako, për pushimin e akuzës për pastrim parash ndaj Bashës, ka ngritur shumë pikëpyetje.
Drejtuesja e Prokurorisë së Tiranës, Elisabeta Imeraj, ka thënë për “Report tv”, se u ka kërkuar llogari dy prokurorëve për procedurat e ndjekura.
Karanxha dhe Tako përjashtuan nga vendimi, prokurorin Kolë Hysenaj.
Lidhur me këtë gjë, Imeraj ka kërkuar sqarim nga dy prokurorët.
Gjithashtu ajo kërkon sqarime, se përse nuk është marrë në pyetje Nicolas Muzin, biznesmeni amerikan, të cilit i është garantuar imunitet penal.
Imeraj u ka lënë dy ditë kohë prokurorëve për argumentat, ndërsa ka bërë me dije se nëse nuk është respektuar ligji, vendimi do të jetë nul.
Prokuroria e Tiranës mori si të pandehur kreun e opozitës, Lulzim Bashën, për çështjen e lobimit në SHBA me paratë ruse, për zgjedhjet e 2017-ës.
Organi i akuzës ka kërkuar nga gjykata, që të caktojë një datë gjyqi për Bashën, Ristanin dhe Dervishin.
Basha akuzohet vetëm për falsifikim formulari, ndërsa akuza për pastrim të produkteve të veprës penale ka rënë.
Bëhet fjalë për 650 mijë euro, të cilat nuk janë deklaruar në raportin financiar të PD.
