Këshilli Bashkiak i Tiranës, gjatë mbledhjes së fundit, miratoi vendimin “Për kontriburin e sektorit privat në krijimin e fondit të banesave sociale, që kalojnë në pronësi të Bashkisë, nga ndërtimet e reja”.
Kreu i Bashkisë, Erion Veliaj, sqaroi se ky vendim, i detyron ndërtuesit, që të vënë në dispozicion për banesa sociale, 3% të ndërtimit.
Sipas Veliajt, kjo do t’i japë fund ngërçit të krijuar, shkruan “Tirana Post”.
Më tej ai shton, se shumë bashki të tjera do të ndjekin këtë model.
“Ne kemi qenë në një ngërç sepse na duhet të përkthejmë në aktet nënligjore se si do zbatohet 3% i banesave sociale për ndërtuesit. Pra përveç taksës që i paguhet bashkisë, ka edhe një fond të banesave sociale. Ligji ua ka kaluar bashkive sesi duhet ta interpretojmë. Pra, ajo që kemi bërë me këtë vendim, i kemi dhënë sot disa mundësi privatit, mund të na japi 3% aty ku ndërton, mund të na e japi këtë 3% sipas vlerës së vendit ku po ndërton në një vend tjetër, në qoftë se ka një fond banesash të pa shitura. Pra jo të njëjtat metra katror, por në të njëjtën vlerë të këtij 3% të vendit ku është e vlefshme leja. Ose tjetra, 3% mund të zgjedh ta paguajë edhe në cash me vlerën e ndërtimit të asaj zone kadastrale. Ky shkon në një fond të posaçëm vetëm për banesa sociale. Pra, nuk mund të mbjellim pemë ose të bëjmë korsi biçikletash me këtë fond, sepse vjen si rrjedhojë e këtij sqarimi për t’u përdorur ekskluzivisht për banesat sociale. Kështu zgjidhim edhe këtë ngërç. Jam i bindur se pas nesh do të kemi shumë bashki të tjera që do ta ndjekin”, tha kryetari i Bashkisë së Tiranës.
Ky ligj ka hyrë në fuqi që në 30 nëntor të vitit të kaluar.
Kjo do të thotë se të gjithë ndërtimet e reja, që janë bërë nga kjo datë, duhet të vënë në dispozicion sipërfaqjen e banimit që parashikon ligji.
