Të gjithë ushtarakët nga data 1 korrik do të kenë një pagë 30% më të lartë. Ky vendim u njoftua nga ministri i Mbrojtjes Niko Peleshi gjatë mbledhjes së sotme të Këshillit të Ministrave. Peleshi e konsideron këtë rritje si historike, dhe shton se premtimi i kryeministrit Rama tashmë është jetësuar.
Vlen të theksojmë se vendi ynë tashmë është në një krizë, ku rritja e çmimeve të produkteve është alarmante dhe një pikëpyetje ngrihet nëse kjo rritje page e ushtarakëve duhej adresuar pikërisht tani.
“Kemi marrë një vendim që nuk merret shpesh. Në 30 vite nuk ka pasur një vendim si ky që lidhet me trajtimin me pagë të personelit ushtarak.Rritje historike e pagës, jam krenar dhe mirënjohës që premtimi i kryeministrit është jetësuar. Të gjithë ushtarakët nga data 1 korrik do kenë pagë 30% më të lartë. Ç’ka do të thotë se, paga minimale në FA është më shumë se 51 mijë lekë të reja, shtuar këtu dhe paga shtesë të trajtimit ushqimor dhe trajtime të tjera sipas vështirësive. Kemi krijuar dhe një aneks, ku kjo kategori, merr shtesë mbi pagën shtesë. Si struktura ushtarake e mbrojtjes kibernetike, veç 30% do marr dhe 20 mijë lekë të reja shtesë. Shtesa kemi parashikuar edhe për funksione të tjera, të trupave komando. Trupave speciale, të mjekëve brenda FA, pra janë 38 pozicione që marrin shtesë mbi shtesë”, u shpreh ministri.
