Deputetja e Partisë Demokratike, Jorida Tabaku, ka deklaruar se vendimi i Gjykatës Kushtetuese për rrëzimin e tatimit 15% për profesionet e lira është një fitore e madhe për qytetarët shqiptarë. Pas vendimit të sotëm, Tabaku theksoi se ky është një triumf i rëndësishëm për të gjitha profesionet e lira që ishin të diskriminuara nga tatimi i padrejtë.
“Pas paraqitjes së argumenteve dhe fakteve, ne fituam sot një betejë për të gjitha këto profesione të lira. Gjykata Kushtetuese vendosi që tatimi mbi profesionet e lira është antikushtetues dhe diskriminues. Për këtë arsye, nuk ka asnjë bazë ligjore që ky tatim të trajtohet ndryshe nga profesionet e tjera,” tha Tabaku.
Ajo theksoi se ky vendim nuk është vetëm një sukses për grupin parlamentar të PD-së dhe për profesionistët e lirë, por mbi të gjitha është një fitore për qytetarët shqiptarë, veçanërisht për shtresën e mesme. “Kjo është një betejë e fituar për ata që punojnë me mundim dhe që në mënyrë të padrejtë ishin duke u taksuar më shumë se çdo biznes tjetër,” shtoi Tabaku.
Gjykata Kushtetuese vendosi të pranojë pjesërisht kërkesën e Partisë Demokratike dhe të shfuqizojë nenin 69, pika “dh”, të ligjit “Për tatimin mbi të ardhurat”, duke rrëzuar tatimin prej 15 deri në 23 për qind që qeveria kishte vendosur për profesionet e lira. Ky vendim vjen pas një beteje ligjore të gjatë dhe kundërshtimeve të shumta nga ana e opozitës dhe profesionistëve të lirë, të cilët argumentonin se ligji ishte i padrejtë dhe diskriminues.
