Ditën e sotme menjëherë pas vendimit të KAS ka reaguar deputeti i Partisë Demokratike, Enkelejd Alibeaj pas vendimit të KAS për ta regjistruar PD me grupin e tij. Në një reagim, deputeti thotë se vendimi i sotëm është një konfirmim i detyrimit ligjor për të regjistruar partinë në zgjedhje. Sipas Alibeajt, vonesa dy javore për këtë proces me autor Celibashin, është një dëm që u është bërë demokratëve.
Në fund, Alibeaj fton të gjithë demokratët që të bashkohen bashkë dhe të futen në zgjedhje me një kandidat të vetëm.
‘Vendimi i sotëm i KAS është konfirmim i detyrimit ligjor për të regjistruar PD në zgjedhjet lokale të 14 majit. Vonesa gati dy javore për këtë proces, me autor kryekomisionerin Celibashi është një dëm që u është bërë demokratëve dhe shqiptarëve nga zgjatimet e politikës së vjetër në institucionet e pavarura kushtetuese.Me këtë rast, edhe njëherë ftojmë të gjithë kandidatët demokratë, pa asnjë dallim të bashkohemi dhe të prezantohemi me një kandidat të PD në zgjedhjet lokale. Le të lemë mënjanë mëritë dhe mosmarrveshjet dhe le të bëjmë më të mirën e mundshme përballë regjimit të Edi Ramës.’- shkruan Alibeaj.
Komisioni i Ankimimeve dhe Sanksioneve rrëzoi ditën e sotme vendimin e KQZ-së për fatin e Partisë Demokratike në zgjedhjet e 14 Majit. KAS mori vendimin për të regjistruar Partinë Demokratike në zgjedhje, me përfaqësues Enkelejd Alibeajn. Sipas tyre, Alibeaj duhet të plotësoje me emrin e tij dokumentacionin.
